Jetz‘ erscht is‘ der Johannvetter zu sich kumme. Van die Hannibäsel hot ‘r merklich nie gedenkt. Na, merklich a fesches Frauenzimmer! Stark wie a Lokomotiv, Arm üwernand wie a Ringkämpfer, die arweit den Teufel zamm, un‘ wie er halt die Hannibäsel amol uf der Gass‘ begengt hot, hot ‘r sie freundlich gegrüßt un‘ hot sich mit ihr in a G’spräch eing’loßt.
Nun hen sich die Mäuler im Darf ufgetu. Des G’rdt hot die zwa Leut‘ immer mehr zammgetriewe‘ un‘ ob sie hen wölle‘ oder net, uf amol ischt’s zur Hochzeit kumme‘. Die Leut‘ hen nom g’sagt: „Ich hab’s jo g’wüßt, daß es so weit kumme‘ werd.“
Der Storm hot sich g’legt un‘ alles war wieder beim Alte‘. Die großi Sensation war varüwer un‘ nun hot m’r nar wieder vum gute‘ Wein un‘ Schnaps g’redt. Nar beim Bäck‘ im Haus hot m’r öfters Lärm g’hört. Die Nachbarsleut‘ hen verzählt, daß es beim Johannvetter öfters Krieg gibt. Amol wär ‘r acht Täg‘ lang gar net uf die Gass kumme‘, weil ‘r ganz verkratzt war im G’sicht. Des war awer nar so a Geplausch. Der Johannvetter hot verzählt, er wär im Weingarte‘ in a Akazie’heck g’falle‘ un‘ so wara die böse‘ Mäuler g’stopft.
Amol awer, es war grad Kerchweih im Darf, hot sich a großes Ereignis abg’spielt. Wie ‘s schun an Kerchweih is‘. Var der Kerch stehn die Ständer, die Drechsler, die Siewerer, die Würflspieler, ‘es Ringelspiel un‘ üwerall is‘ alles voll Kinder un‘ Mensche‘, daß m’r sich fast net rühre‘ kann. Ufa am Eck grad stehe‘ mehreri Einheimischi mit ihriGäscht un‘ verzähle‘ halt üwer alles G’schegeni in dene‘ letschte‘ Täg doher. Die Ortsbeamte wara aa do. Die hen sich sofort noch der Politik erkundigt usw., wie des schun geht, wann Fremdi un‘ Einheimischi zammkumme‘. Uf amol wird a wilder Schrei hörbar.
„Platz – Hilf!“ – „Joj, Platz – Hilf!“
Die Männer schaua darthin, vun wu die Hilfruf‘ herkumme‘. Nun awer – wer möchte’s glaawe‘ – do siegt m’r a hochgehowener Bachschießer un‘ durich die Meng‘ zwa Schatte‘ renne‘. Die Hannibäsel jagt den Johannvetter. Der verliert bereits die „duscha“ un‘ rennt in den Haufe‘ vun Männer ‘nei‘. Hinter’m Herrn Klaanrichter seim Buckel hot ‘r Schutz g’sucht,hot ‘n an der Achsel ang’packt un‘ hot ‘n varg’schowe‘.Jetz‘ hot die Hannibäsel weiche‘ müsse‘. Mit anständichi paar Schimpfworte‘ hot sie sich umgedreht un‘ is‘ mit ‘em Backschießer haamgange, indem ihr die Leut‘ in ama große‘ Umkraas aus ‘em Weg gange‘ sin‘.
Der Johannvetter awer is‘ zwischer dene‘ Männer g’stanna, hot sich der Schwitz g’wischt un‘ hot keucht:
„Kruzigiftsgschicht, wer‘ hätt‘ sich des gedenkt! Armer Schmied! Du bisch sicher im Himmelreich, denn die Höll hosch do g’hat …!
O, was hen die Männer g’lacht. Aaner hot g’maant:
„Du hosch doch mol g’sagt – du bindscht sie an die Bettstatt an – un‘ schmiersch bis sie nimmi „b“ saga kann …“
„Jo“ hot der Bäck’maschter g’sagt un‘ hot so üwerzwerch dreig’schaut, „die hot jo mich jetz‘ anbinde‘ wöell‘! Wann ich net so g’schwind ‘es Törel verwisch, wer waaß wie’s m’r ganga wäe ….! Die zwinge‘ neunun’neunzich Teufel net …!
Des Markgewimmel hot wieder ang’fanga, die Leut‘ sin‘ durichanandergange‘ un‘ alles war wieder, wie wann niks vorgange‘ wär‘ …
Nar die G’schicht vum kuraschierte‘ Johannvetter wird noch weiter lewe‘ …
|